نئی دہلی (نیوز ڈیسک ) بھارتی سپریم کورٹ نے نیوز کلک کے بانی پربیر پورکایستھا اور اس کے ایچ آر سربراہ امیت چکرورتی کی گرفتاری کے خلاف درخواستوں پر دہلی پولیس سے جواب طلب کر لیا ہے۔
جسٹس بی آر گاوائی اور جسٹس پرشانت کمار مشرا کی بنچ نے دہلی پولیس کو نوٹس جاری کیا اور 30 اکتوبر تک جواب طلب کیا۔ پربیر پورکایستھا کی طرف سے سینئر وکیل کپل سبل جبکہ چکر ورتی کی طرف سے دیودت کامت نے عدالت میں پیش ہوئے۔
دہلی ہائی کورٹ نے 13 اکتوبر کو اس معاملے میں گرفتاری اور اس کے بعد پولیس ریمانڈ کے خلاف ان کی درخواستیں خارج کی تھیں۔ دونوں کو دہلی پولیس کے سپیشل سیل نے 3 اکتوبر کو گرفتار کیا تھا۔ ان پر غیر قانونی سرگرمیوں کی روک تھام کا کالا قانون یو اے پی اے عائد کیا گیا ہے۔