سری نگر (نیوز ڈیسک) ورلڈ کپ کے فائنل میں آسٹریلیا کے ہاتھوں بدترین شکست کا غصہ بھارت نے مقبوضہ کشمیر کے طلبا پر نکال دیا۔ غیر ملکی میڈیا رپورٹس کے مطابق مقبوضہ کشمیر کی ایگریکلچرل یونیورسٹی کے ایک بھارتی طالبعلم نے 7 مسلمان طلبا کے خلاف پولیس کو مقدمہ درج کرایا جس میں موقف اپنایا تھا کہ مذکورہ 7 مسلمان طلبا نے ورلڈکپ فائنل میں آسٹریلیا کے ہاتھوں بھارت کی شکست پر خوشی کا اظہار کیا اور جشن منایا تھا اس کے علاوہ پاکستان زندہ باد کے نعرے بھی لگائے گئے۔ بھارتی طالبعلم نے مزید کہا کہ طلبا کی اس حرکت سے یونیورسٹی میں اشتعال پھیلا اور ہندو طلبا میں غم و غصے کی لہر دوڑ گئی تھی جو کسی کشیدگی کا باعث بھی بن سکتی تھی، پولیس نے درخواست پر کارروائی کرتے ہوئے کئی روز بعد 7 مسلمان طلبا کو حراست میں لے لیا۔
دوسری جانب مسلم طلبا کے اہل خانہ اور علاقہ مکینوں نے بھارتی سکیورٹی فورسز کے خلاف احتجاج کرتے ہوئے کہا ہے کہ طلبا کو صرف مسلمان اور کشمیری ہونے کی سزا دی جا رہی ہے
