ممبئی (نیوز ڈیسک ) بھارتی ریاست تامل ناڈو میں طوفان میچونگ کے باعث طوفانی بارشیں جاری ہیں جس سے چنئی شہر بری طرح متاثر ہوا ہے۔
بھارتی میڈیا کے مطابق طوفان میچونگ آندھرا کے ساحل کی طرف بڑھ رہا ہے تاہم طوفان سے ریاست تامل ناڈو اور پوڈوچیری میں شدید بارشیں جاری ہیں جب کہ ریاست تامل ناڈو کے شمالی ساحل پر ہونے والی بارشوں سے چنئی شہر اور دیگر اضلاع شدید متاثر ہوئے ہیں۔
Chennai Airport #CycloneMichaung Brutally smashing credits Nandakumar pic.twitter.com/mIjNLehYRG
— MasRainman (@MasRainman) December 4, 2023
بھارتی میڈیا کا کہنا ہےکہ چنئی شہر کے بیشترعلاقے پانی میں ڈوبے ہوئے ہیں جب کہ نشیبی علاقوں میں گھروں میں پانی داخل ہوگیا ہے اور بعض علاقوں میں سیلابی ریلا گاڑیوں کو بھی بہالے گیا۔
بھارتی میڈیا کے مطابق چنئی کے پڑوسی اضلاع میں رات گئے شدید بارشیں ہوئیں اور اس دوران بعض مقامات پر 196 ملی میٹر تک بارش ریکارڈ کی گئی ہے۔
رپورٹس کے مطابق چنئی شہر میں ہونے والی شدید بارشوں کی وجہ سے اسکول، کالجز اور سرکاری دفاتر میں آج چھٹی کا اعلان کیا گیا ہے جب کہ ریاستی حکومت نے نجی اداروں پر زور دیا ہےکہ اس صورتحال میں وہ ملازمین کو گھروں سے کام کرنے کی ہدایات جاری کریں۔
🔴#CycloneMichaung | Chennai Airport closed for arrival and departure till 11 pm today amid heavy rainfaill across Tamil Nadu #ChennaiRains #TamilNadu
— NDTV (@ndtv) December 4, 2023
بھارتی میڈیا کا بتانا ہے کہ چنئی میں شدید بارش کے باعث پیش آنے والے حادثات میں اب تک 2 افراد کی ہلاکت کی تصدیق ہوئی ہے، مقامی حکام نے ساحلی اضلاع میں 5 ہزار ریلیف سینٹرز قائم کردیے ہیں۔
شہر میں طوفانی بارش کی وجہ سے چنئی ائیرپورٹ بھی زیر آب آگیا جہاں رن وے تالاب کا منظر پیش کررہا ہے، ائیرپورٹ انتظامیہ نے بدترین صورتحال کے سبب 12 ڈومیسٹک اور بین الاقوامی پروازوں کو بھی منسوخ کردیا۔
