لکھنو(نیوز ڈیسک ) بھارتی ریاست اترپردیش میں پولیس نے وزیر اعظم نریندر مودی کے دورہ ایودھیا سے قبل مقبوضہ جموں و کشمیر سے تعلق رکھنے والے چار بے گناہ افراد کو گرفتار کر لیا جن میں ایک خاتون بھی شامل ہے۔
کشمیر میڈیا سروس کے مطابق تھانہ کوتوالی کے سٹیشن ہائوس آفیسر (ایس ایچ او)سری رام پانڈے نے بتایا کہ گرفتار کشمیریوں کا تعلق جموں وکشمیرکے ضلع پونچھ سے ہے اور انہیں جمعہ کی رات ایک ہوٹل سے گرفتار کیا گیا۔انہوں نے کہاکہ یہ کارروائی وزیر اعظم مودی کے دورہ ایودھیا کے پیش نظر نگرانی کے ایک حصے کے طور پر کی گئی ہے۔ ایس ایچ او نے بتایا کہ چاروں افرادسے پوچھ گچھ کی جا رہی ہے اور ان کے شناختی کارڈ اور دیگر دستاویزات کی جانچ پڑتال کی جا رہی ہے۔ ایس ایچ او کے مطابق گرفتارافراد نے بتایا کہ وہ ایک مدرسے میں کام کرتے ہیں اور چندہ لینے کے لئے باربنکی آئے ہیں اوروہ اس مقصد کے لئے ہرسال موسم سرما میں ملک کے مختلف علاقوں میں جاتے ہیں۔