لدھیانہ(نیوز ڈیسک ) بھارت کے شہر لدھیانہ میں بھارتی سینٹرل انڈسٹریل سیکورٹی فورس(سی آئی ایس ایف)کا ایک اہلکار اس وقت ہلاک ہو گیا جب اس کی سروس پستول سے غلطی سے گولی چل گئی۔
کشمیرمیڈیاسروس کے مطابق یہ واقعہ لدھیانہ سے کانگریس کے رکن پارلیمنٹ رونیت سنگھ بٹو کی سرکاری رہائش گاہ پر پیش آیاجو شہر کے علاقے گلاب باغ میں واقع ہے۔ ڈپٹی کمشنر سمیر ورما نے دعویٰ کیا کہ مذکورہ اہلکارسندیپ سنگھ جس کا تعلق ریاست اتر پردیش سے ہے، اپنے کمرے میں اکیلے اپنے پستول کو صاف کر رہا تھا جب اچانگ گولی چل گئی۔ پولیس نے بتایا کہ گولی اس کی ٹھوڑی کے نیچے لگ گئی ۔ڈی سی نے دعوی کیا کہ ابتدائی طور پر ایسا لگتا ہے کہ گولی حادثاتی طور پر چل گئی ہے۔ گولی چلنے کی آواز سن کر اس کے ساتھی اس کے کمرے میں پہنچ گئے جہاں سندیپ کو خون میں لت پت پایا گیا۔ ڈی سی نے بتایا کہ گارڈ کو فوری طور پر ہسپتال لے جایا گیا جہاں اسے مردہ قرار دے دیا گیا۔ پولیس نے لاش کو پوسٹ مارٹم کے لیے مقامی سول اسپتال منتقل کردیاہے۔