ایشیا کپ کے دوران پاکستان سے جیت کر اسپورٹس مین اسپرٹ کے تمام تقاضوں کو بالائے طاق رکھنے والے بھارت کو جلد ہی سبق حاصل ہو گیا۔

کامن ویلتھ بیچ ہینڈ بال چیمپئن شپ میں راوئیتی حریفوں کے درمیان میچ میں پاکستان نے بھارت کو عبرت ناک شکست سے دوچار کیا، میچ کے فوراً بعد بھارتی کھلاڑیوں نے پاکستانی ٹیم سے نہ صرف ہاتھ ملائے  بلکہ خیر سگالی کے جذبات کا اظہار بھی کیا۔

پاکستان نے روایتی حریف کو 0-2 سے عبرت ناک شکست دی۔ پاکستان نے یہ کامیابی 26-9 ، 34-12 کے اسکور سے حاصل کی۔

نمایاں کارکردگی پر پاکستان کے احمد حسین مین آف دی میچ قرار پائے۔ چیمپئن شپ میں پاکستان آج مالدیپ اور سری لنکا کا سامنا کرے گا۔

واضح رہے کہ بھارت حالیہ دنوں میں ایشیا کپ کے ٹاکرے کی ٹاس کے وقت بھارتی کپتان  سریاکمار یادو پاکستانی کپتان سلمان علی آغا سے ہاتھ ملانے سے کترائے تھے۔

بات صرف کپتان تک ہی محدود نہ رہی تھی بلکہ میچ کے بعد پوری بھارتی ٹیم پاکستانی کھلاڑیوں سے ہاتھ ملائے بنا ڈریسنگ روم لوٹ گئی تھی۔

بھارتی میڈیا کے مطابق  بھارتی ٹیم کے ہیڈکوچ گوتم گمبھیر  نے اپنےکھلاڑیوں کو پاکستانی کرکٹرز سے ہاتھ ملانے سے منع کیا تھا۔

بھارتی ٹیم کا یہ بچگانہ رویہ دنیا بھر  تنقید کا نشانہ بنا اور بھارتی ٹیم کو اسپورٹس مین اسپرٹ سے عاری قرار دیا گیا تھا۔