اسلام آباد ایئر پورٹ پر غیر ملکی ایئر لائن کا طیارہ لینڈنگ کے دوران ہولناک حادثے سے بال بال بچ گیا۔

پاکستان ایئرپورٹ اتھارٹی کے ذرائع کے مطابق ایئر ٹریفک کنٹرولر کے بروقت اقدام نے طیارے کو بند رن وے پر لینڈنگ سے روک دیا ، غیرملکی ایئر لائن کی پرواز جدہ سے اسلام آباد پہنچی تھی۔

اسلام آباد ایئر پورٹ کا رن وے 28 لیفٹ مرمت کے لیے بند ہے، پی اے اے نے رن وے 28 لیفٹ بند ہونے اور رن وے 28 رائٹ کھلے ہونے کا نوٹم بھی جاری کیا ہوا ہے۔

پائلٹ نے لینڈنگ اپروچ 28 رائٹ کے بجائے 28 لیفٹ کے بند رن وے کی بنائی، ایئر ٹریفک کنٹرولر نے پائلٹ کو غلط رن وے پر ہونے کا بتایا لیکن پائلٹ آخر وقت تک کہتا رہا کہ وہ ٹھیک رن وے پر ہے۔

ایئر ٹریفک کنٹرولر نے عین وقت پر پائلٹ کو لینڈنگ سے روک کر دوبارہ چکر لگانے کا کہا۔ ،دوسری کوشش میں ایئر لائن کے بوئنگ 777 طیارے نے درست رن وے پر لینڈ کیا، طیارے کے 28 لیفٹ پر لینڈنگ اپروچ بناتے وقت رن وے پر بڑی تعداد میں لوگ اور گاڑیاں موجود تھیں۔

ذرائع نے بتایا کہ غلط رن وے پر لینڈنگ ہو جانے سے سنگین حادثہ پیش آ سکتا تھا، بوئنگ 777 طیارے میں سیکڑوں مسافر موجود تھے۔ ترجمان پی اے اے کے مطابق پاکستان ایئرپورٹس اتھارٹی نے واقعے کا نوٹس لے لیا ہے۔