انسداد دہشت گردی عدالت راولپنڈی نے شوکت خانم اسپتال کے 4 بینک اکاؤنٹس ڈی فریز کرنے کا حکم دے دیا۔
بانی پی ٹی آئی کی ہمشیرہ علیمہ خان کے خلاف 26 نومبر کے احتجاج پر درج مقدمے کی سماعت کے دوران اے ٹی سی کے جج امجد علی شاہ نے نمل یونیورسٹی کے اکاؤنٹس بھی ڈی فریز کرنے کا حکم دے دیا۔
پراسیکیوٹر ظہیر شاہ نے کہا کہ شوکت خانم اسپتال کے اکاؤنٹ منجمد کرنے کی تحریری درخواست دائر نہیں کی گئی۔ علیمہ خان کے ذاتی اکاؤنٹ منجمد کرنے کے لیے ان کا شناختی کارڈ نمبر بھیجا تھا، اسٹیٹ بینک نے شناختی کارڈ پر درج اکاؤنٹ بند کر دیئے۔
پراسیکیوٹر نے کہا کہ پراسیکیوشن کو شوکت خانم اور نمل یونیورسٹی کے اکاؤنٹس ڈی فریز کرنے پر کوئی اعتراض نہیں۔ عدالت نے فریقین کے دلائل سننے کے بعد نمل یونیورسٹی اور شوکت خانم کے اکاؤنٹس ڈی فریز کرنے کا حکم دے دیا۔
واضح رہے کہ عدالت نے پیش نہ ہونے پر علیمہ خان کا شناختی کارڈ اور پاسپورٹ ضبط کرنے اور بینک اکاؤنٹ منجمد کرنے کے احکامات دیے تھے۔
