اسلام آباد(نیوز ڈیسک)نریندر مودی کی فسطائی بھارتی حکومت کھیلوں کو سیاسی رنگ دے رہی ہے جیسا کہ بھارتی حکام کی جانب سے پاکستان کی بلائنڈ کرکٹ ٹیم کو ویزے جاری نہ کرنے کی وجہ سے وہ ٹی ٹوئنٹی عالمی کپ کرکٹ ٹورنامنٹ میں شرکت نہیں کرسکے گی۔
ذرائع کے مطابق پاکستان بلائنڈ کرکٹ ٹیم کو05سے 17دسمبر تک منعقد ہونے والے تیسرے ٹی ٹونٹی عالمی کپ کرکٹ ٹورنامنٹ میں شرکت کرنا تھی تاہم بھارت نے پاکستانی ٹیم کو ویزے جاری نہیں کئے۔دفتر خارجہ کے ترجمان نے آج ایک بیان میں بھارت کی جانب سے پاکستانی بلائنڈ کرکٹ ٹیم کو ویزے جاری نہ کرنے پر گہرے افسوس کا اظہار کیا۔ انہوں نے کہا کہ بھارتی فیصلے کے نتیجے میں پاکستانی کھلاڑی خصوصی اہمیت کے حامل بین الاقوامی کھیلوں کے ایونٹ میں شرکت سے محروم ہو جائیں گے۔ترجمان نے کہا کہ یہ فیصلہ خصوصی فراد میں کھیلوں کے فروغ کے لیے بھارت کی غیر حساسیت کو ظاہر کرتا ہے۔ انہوں نے کہاکہ کھیلوں کے مقابلوں کو سیاسی رنگ نہیں دینا چاہیے۔