نئی دہلی(نیوز ڈیسک )بھارتی سپریم کورٹ نے خاتون صحافی رعنا ایوب کی وہ درخواست مسترد کردی ہے جس میں انہوں نے منی لانڈرنگ کے ایک مقدمے میں غازی آباد کی خصوصی عدالت کے سمن کو چیلنج کیا تھا۔
جسٹس وی راما سبرامنیم اور جسٹس جے بی پردی والا پر مشتمل بنچ نے رعنا ایوب کو اس بات کی اجازت دی کہ وہ ٹرائل کورٹ کے سامنے دائرہ اختیار کامسئلہ اٹھاسکتی ہے کیونکہ یہ شواہد کا سوال ہے۔سپریم کورٹ نے رواں سال 31جنوری کو رعنا ایوب کی طرف سے سمن کو چیلنج کرنے والی درخواست پر فیصلہ محفوظ کر لیا تھا۔25جنوری کو سپریم کورٹ نے بھارتی ریاست اتر پردیش کے شہر غازی آباد کی خصوصی عدالت سے کہاتھا کہ وہ رعنا ایوب کے خلاف منی لانڈرنگ کیس پر 27جنوری کو ہونے والی سماعت کو 31جنوری کے بعد کی تاریخ تک ملتوی کردے۔رعنا ایوب نے اپنی درخواست میں غازی آباد میں بھارتی انفورسمنٹ ڈائریکٹوریٹ کی طرف سے شروع کی گئی عدالتی کارروائی کو اس کادائرہ اختیار نہ ہونے کی بنیاد پر کالعدم قراردینے کی استدعا کی تھی کیونکہ مبینہ منی لانڈرنگ کا جرم ممبئی میں ہوا ہے ۔