ممبئی (نیوز ڈیسک ) بھارتی ریاست مہاراشٹر کے سولاپور کے ایک کسان کو اس وقت سخت صدمہ پہنچا جب اسے یہ معلوم ہوا کہ اس نے ایک آڑھتی کو اپنے 512 کلو گرام پیاز کی فروخت کی مد میں محض 2 روپے 49 پیسے کا منافع کمایا ہے۔
خبر ایجنسی پی ٹی آئی کے مطابق سولاپور کی تحصیل بارشی میں رہنے والے 63 سالہ کسان راجندر چوہان نے بتایا کہ سولاپور مارکیٹ یارڈ میں اس کی پیاز کی پیداوار کی قیمت 1 روپیہ فی کلو گرام تھی اور تمام کٹوتیوں کے بعد اسے یہ معمولی رقم اپنے خالص منافع کے طور پر ملی۔
میں نے سولاپور میں پیاز کے ایک تاجر کو پانچ کوئنٹل سے زیادہ وزنی پیاز کے 10 تھیلے فروخت کے لیے بھیجے تھے۔ لیکن لوڈنگ، ٹرانسپورٹ، مزدوری اور دیگر کے چارجز کو کاٹنے کے بعد، مجھے صرف 2 روپے 49 پیسے کا منافع ملا۔
کسان کے مطابق آڑھتی نے اسے 100 روپے فی کوئنٹل (100 کلو گرام) کا ریٹ دیا۔ اس کے پیازوں کا مجموعی وزن 512 کلوگرام تھا جن کی قیمت 512 روپے بنی اور کٹوتیوں کے بعد ڈھائی روپے سے بھی کم ہاتھ آئے۔