نئی دلی (نیوز ڈیسک)برطانوی وزیر خارجہ جیمز کلیورلی نے اپنے بھارتی ہم منصب ایس جے شنکر کے ساتھ ملاقات میں نئی دلی اور ممبئی میں بی بی سی کے دفاتر پر محکمہ انکم ٹیکس کے چھاپوں کا معاملہ اٹھایا ہے ۔
کشمیرمیڈیاسروس کے مطابق برطانوی وزیر خارجہ نے یہ معاملہ ایس جے شنکر سے نئی دلی میں ایک ملاقات کے دوران اٹھایا ۔ جیمز کلیورلی گروپ 20 کے وزرائے خارجہ کے اجلاس میں شرکت کیلئے نئی دلی میں ہیں ۔ ایک انٹرویو میں انہوں نے بتایا کہ انہوں نے بھارتی وزیر خارجہ سے ملاقات کے دوران گزشتہ ماہ بی بی سی کے دفاتر پر محکمہ انکم ٹیکس کے چھاپوں کا معاملہ اٹھایا ہے ۔
واضح رہے کہ برطانوی سیاست دانوں نے گزشتہ ہفتے دارلعوام میں بی بی سی کے دفاتر پر چھاپوں سخت تشویش کا اظہار کرتے ہوئے اس معاملے پر بھارتی حکومت کے ساتھ رابطوں پر برطانوی حکومت سے سوال کیاتھا۔ 2002میں گجرات کے مسلم کش فسادات میں بھارتی وزیر اعظم نریندر مودی کے کردار کے بارے میں بی بی سی کی دو حصوں پر مشتمل دستاویزی فلم جاری کئے جانے کے بعد نئی دلی اور ممبئی میں بی بی سی کے دفاتر پر چھاپے مارے گئے تھے ۔ بھارت میں اس دستاویزی فلم پر پابندی بھی عائد کر دی گئی تھی۔