سرینگر(نیوز ڈیسک ) غیر قانونی طور پر بھارت کے زیر قبضہ جموں و کشمیر میں پیپلز ڈیموکریٹک پارٹی کی صدر محبوبہ مفتی نے شب برات کے موقع پر جامع مسجد سرینگر کی تالہ بندی پرقابض حکام کی شدید مذمت کی ہے۔
محبوبہ مفتی نے ایک ٹوئٹ میں کہا کہ شب برات کے موقع پر جامع مسجد کو تالا لگانا بنیادی حقوق اور مذہبی آزادی کی کھلی خلاف ورزی ہے۔ انہوں نے دعاکی کہ اللہ تعالی ہمیں اس مشکل وقت سے نکلنے کی توفیق عطا فرمائے۔قبل ازیں انجمن اوقاف جامع مسجد سرینگر نے کہا کہ حکام نے شب برات کے موقع پر تاریخی جامع مسجد میں نماز ادا کرنے کی اجازت نہیں دی ہے۔ایک بیان میں انجمن نے بتایا کہ بھارتی پولیس اور انتظامیہ کے اہلکارشام 5.30 بجے جامع مسجد آئے اور دروازوں کو تالے لگا کر انجمن کو مطلع کیا کہ ڈی سی سرینگر کے حکم کے مطابق شب برات کے موقع پر مسجد میں نمازادا کرنے کی اجازت نہیں ہے۔