اسلام آباد (نیوز ڈیسک ) سیاسی تجزیہ کاروں نے بھارت پر زور دیا ہے کہ وہ جموں و کشمیر پر اپنا غیر قانونی قبضہ ختم کرے اور کشمیریوں کو انکا ناقابل تنسیخ حق ، حق خود ارادیت دے۔
تجزیہ کاروں نے کہا کہ جموں و کشمیر کبھی بھی بھارت کا اٹوٹ انگ نہیں رہا ہے اور نہ ہی کبھی ہوگا۔ انہوںنے کہا کہ اٹوٹ کے بھارتی دعوؤں کی کوئی حیثیت نہیں ہے اور یہ تاریخی حقائق کے بالکل برعکس ہیں۔ تجزیہ کاروں نے اس حوالے سے مقبوضہ جموںوکشمیر کے لیفٹیننٹ گورنر منوج سنہا کے حالیہ بیان کا خاص طور پر حوالہ دیا اور کہا کہ بھارتی رہنماؤں کے ایسے بیانات انکے جارحانہ عزائم کا عکاس ہیں اوریہ بیانات علاقائی امن و استحکام کے لیے مستقل خطرہ ہیں۔
انہوں نے کہا کہ بھارتی رہنماؤں کے یہ دعوے نہ تو تاریخی حقائق اور نہ ہی عالمی سطح پر تسلیم شدہ جموں و کشمیر کی متنازعہ حیثیت کو بدل سکتے ہیں۔تجزیہ کاروں نے کہا کہ بھارت کو جھوٹے اور گمراہ کن دعوو¿ں کا سہارا لینا بند کرنا چاہیے اور مقبوضہ جموںوکشمیر کی زمینی صورتحال تسلیم کر کے کشمیریوں کو انکا پیدائشی حق ، حق خود ارادیت دینا چاہیے جسکا مطالبہ وہ گزشتہ سات دہائیوں سے زائد عرصے سے کر رہے ہیں۔