نئی دہلی(نیوز ڈیسک) انسانی حقوق کی بین الاقوامی تنظیم ‘ہیومن رائٹس واچ’ نے بھارت کے زیر انتظام جموں وکشمیر میں انسانی حقوق کے تحفظ کو برقرار رکھنے کی ضرورت پر زور دیا ہے۔ ہیومن رائٹس واچ کی جنوبی ایشیا کی ڈائریکٹر میناکشی گنگولی نے وی او اے کو بتایا کہ بھارتی حکام کو کشمیر میں انسانی حقوق کے تحفظ کو برقرار رکھنے کی ضرورت ہے بجائے اس کے کہ انسانی حقوق کارکنوں اور صحافیوں کو سزا دی جائے جو مسائل کی طرف توجہ مبذول کراتے ہیں۔ گنگولی نے کہا کہ ، دہشت گردی کے خلاف سخت قوانین کے تحت صحافیوں کی من مانی گرفتاریوں کا سلسلہ جاری ہے، یہ سلسلہ واضح کرتا ہے کہ ہندوستانی حکومت کی پالیسی جابرانہ، امتیازی اور آمرانہ ہے۔
