سرینگر(نیوز ڈیسک ) بھارت نے بدھ کے روز اعتراف کیا کہ 2020، 2021 اور 2022کے دوران 185غیر کشمیریوں نے مقبوضہ جموں و کشمیر میں زمینیں خریدیں۔
کشمیر میڈیا سروس کے مطابق بھارتی پارلیمنٹ کے ایوان بالا راجیہ سبھا میں ایک سوال کے تحریری جواب میں بھارتی وزیر مملکت برائے داخلہ نتیانند رائے نے بتایا کہ 2020میں صرف ایک شخص نے زمین خریدی جبکہ 2021میں 57اور 2022میں 127افراد نے زمین خریدی۔انہوں نے کہا کہ جموں وکشمیرانتظامیہ کی طرف سے فراہم کردہ معلومات کے مطابق ملٹی نیشنل کمپنیوںسمیت مجموعی طوپر 1559بھارتی کمپنیوں نے علاقے میں سرمایہ کاری کی ہے۔مالی سال 2020-21میں310اداروں نے سرمایہ کاری کی جبکہ 2021-22میں 175اور 2022-23میں 1074 اداروںنے سرمایہ کاری کی۔ انہوں نے کہا کہ لداخ انتظامیہ کی طرف سے فراہم کردہ معلومات کے مطابق ملٹی نیشنل کمپنیوں سمیت کسی بھی بھارتی کمپنی نے گزشتہ تین سال کے دوران خطے میں سرمایہ کاری نہیں کی۔