سوڈان)(نیوز ڈیسک ) سوڈان کے دارالحکومت خرطوم میں آرمی اور پیرا ملٹری فورسز میں دوسرے روز بھی جھڑپیں جاری ہیں۔ خبر ایجنسی کے مطابق جھڑپوں میں کم از کم 56 شہری ہلاک اور کئی سو زخمی ہوچکے ہیں۔ خبر ایجنسی کے مطابق سوڈانی فوج انسانی بنیادوں پر ہنگامی صورتحال کےلیے محفوظ راستہ دینے پر رضا مند ہوگئی ہے۔ سوڈانی فوج نے اقوام متحدہ کی سفارش پر ہنگامی محفوظ راستے پر رضامندی دی اور کہا کہ انسانی بنیادوں پر ہنگامی محفوظ راستہ روزانہ 3 گھنٹوں کے لیے کھولا جائے گا۔ سوڈانی فوج نے واضح مؤقف اختیار کیا کہ باغی ملیشیا کی خلاف ورزی کی صورت میں ردعمل کا حق رکھتے ہیں۔ 2021ء میں فوجی بغاوت کے بعد اقتدار پر قبضہ کرنے والی سوڈانی فوج کے خلاف گزشتہ روز پیرا ملٹری فورسز نے بغاوت کی تھی۔ خیال رہے کہ خرطوم میں اقتدار کے لیے 2 سال سے آرمی اور پیراملٹری فورس کے درمیان رسا کشی جاری ہے۔