اسلام آباد (نیوز ڈیسک ) پیس اینڈ کلچر آرگنائزیشن کی چیئرپرسن مشعال حسین ملک نے سری نگر میں گروپ20 اجلاس کے انعقاد پر نریندر مودی کی زیر قیادت فسطائی بھارتی حکومت کو تنقید کا نشانہ بناتے ہوئے اسے مقبوضہ جموںوکشمیر کی اصل صورتحال سے دنیا کو گمراہ کرنے کی کوشش قرار دیا ہے۔ جیل میں بند حریت رہنما یاسین ملک کی اہلیہ مشعال ملک نے آج ایک بیان میں کہا کہ مقبوضہ وادی میں گروپ20 کے اجلاس کا انعقاد محض ایک فریب ہے جس کے ذریعے مودی حکومت مقبوضہ علاقے میں حالات معمول پر ہونے کے اپنے بے بنیاد بیانیے کو تقویت دینا چاہتی ہے۔ انہوںنے کہا کہ بی جے پی حکومت مذکورہ اجلاس کے ذریعے مقبوضہ میںجاری انسانی حقوق کی سنگین خلاف ورزیوں سے بھی دنیا کی توجہ ہٹانا چاہتی ہے۔ مشعال حسین ملک نے کہا کہ گروپ20ملکوں کو یاد رکھنا چاہیے کہ بھارت نے جموں و کشمیر پر غیر قانونی قبضہ کر رکھا ہے جو اقوام متحدہ کی قراردادوں کے مطابق ایک متنازعہ علاقہ ہے لہذا نہیں اس اجلاس میں شرکت سے انکار کر دینا چاہیے۔انہوں نے کہا کہ گروپ20ملکوںکو چاہیے کہ وہ متنازعہ خطے جموںوکشمیر میں تنظیم کے اجلاس میں شرکت کے بجائے مسئلہ کشمیر کے اقوام متحدہ کی قراردادوں کے مطابق حل کیلئے مودی حکومت پر دباؤ ڈالیں۔