اسلام آباد (نیوز ڈیسک ) راجوری میں رات خاموشی سے گزرنے کے بعد معرکہ ایک بار پھر شروع ہو چکا ہے ۔ بھوکے پیاسے مجاہدین کل سے اپنے مورچوں میں ڈٹے ہوئے ہیں جبکہ قابض فوج نے تربیت یافتہ کمانڈوز اور ہیلی کاپٹروں کا استعمال شروع کر دیا ہے ۔
اطلاعات کے مطابق مقبوضہ کشمیر کے ضلع بارہمولہ کے علاقے کرہامہ کنزر ٹنگمرگ میں بھی قابض بھارتی فوج اور مجاہدین کے مابین جھڑپ شروع ہو گئی ہے ۔ موصولہ اطلاع کے مطابق اس دوران ایک مجاہد شہید ہو گیا ہے ۔ جھڑپ اس وقت شروع ہوئی جب قابض فوج نے علاقے میں تلاشی کاروائی شروع کر رکھی تھی ۔
واضح رہے کہ گزشتہ روز غیر قانونی طور پر بھارت کے زیر قبضہ جموں و کشمیر کے ضلع راجوری میں مجاہدین کے حملے میں 5بھارتی فوجی جہنم واصل ہو گئے تھے ۔کشمیر میڈیا سروس کے مطابق ضلع کے علاقے کنڈی میں بھارتی فورسزپر حملے میں 5 فوجی ہلاک اور ایک افسر سمیت متعدداہلکارزخمی ہو ئے ۔فورسز اہلکار علاقے میں تلاشی اور محاصرے کی کارروائی کر رہے تھے ۔بھارتی فوج نے دعویٰ کیاہے کہ ’حریت پسندوں‘ نے فوجی کارروائی کے دوران بارودی مواد کو دھماکے سے اڑا دیا جس سے یہ ہلاکتیں ہوئی ہیں۔