سرینگر11مئی ( نیوز ڈیسک ) بھارت کے غیر قانونی زیر قبضہ جموں وکشمیر میں تحریک آزاد ی کے رہنما غلام نبی شیخ آج سرینگر میں وفات پا گئے ہیں۔
کشمیر میڈیاسروس کے مطابق غلام نبی شیخ کی عمر تقریباً 80برس تھی۔ وہ آزادی پسند تنظیم محاذ آزادی کے ساتھ وابستہ تھے۔ مرحوم انتہائی ملنسار اور سادہ طبعیت کے مالک تھے ۔ وہ زندگی کے آخری لمحات تک تحریک آزادی کے ساتھ عزم وہمت سے وابستہ رہے۔
دریں اثنا کل جماعتی حریت کانفرنس کی اکائی جموں وکشمیر ڈیموکریٹک فریڈم پارٹی نے سرینگر میں جاری ایک بیان میں غلام نبی شیخ کی وفات پر گہرے دکھ اور افسوس کا اظہار کرتے ہوئے مرحوم کے درجات کی بلندی اور لواحقین کیلئے صبر جمیل کی دعا کی۔ کل جماعتی حریت کانفرنس آزاد جموں وکشمیر شاخ کے کنوینر اور ڈیموکریٹک فریڈم پارٹی(ڈی ایف پی) کے قائمقام چیئرمین محمود احمد ساغر نے اسلام آبادمیں جاری ایک بیان میں غلام نبی شیخ کے فرزندضمیر احمد شیخ اور دیگر لواحقین سے اظہار تعزیت کرتے ہوئے کہا کہ مرحوم کو تحریک آزادی میں بے لوث خدمات اور مثالی کردار پر ہمیشہ یاد رکھا جائے گا۔
