سرینگر (نیوز ڈیسک ) غیر قانونی طور پر بھارت کے زیر قبضہ جموں و کشمیر میں مختلف علاقوں میں پوسٹرچسپاں کئے گئے ہیں جن میں لوگوں پر زور دیا گیا ہے کہ وہ نریندر مودی کی فسطائی بھارتی حکومت کی طرف سے سرینگر میںگروپ20 کااجلاس منعقد کئے جانے کے خلاف 22مئی کو مکمل ہڑتال کریں۔
کشمیر میڈیا سروس کے مطابق کل جماعتی حریت کانفرنس نے مودی حکومت کے مذموم اقدام کے خلاف احتجاج کے لیے 22مئی کو مقبوضہ جموں و کشمیر اور آزاد جموں و کشمیر میں مکمل ہڑتال کی کال دی ہے۔پوسٹرجموں و کشمیر یوتھ اسٹوڈنٹس فورم کی جانب سے کپواڑہ اور دیگر علاقوں میں چسپاں کیے گئے ہیں۔کل جماعتی حریت کانفرنس نے مودی حکومت کی طرف سے 22سے 24مئی تک سرینگر میں گروپ20کے اجلاس سے قبل مقبوضہ جموں وکشمیرمیں بھارتی ریاستی دہشت گردی میں اضافے کی شدید مذمت کی ہے۔
