سرینگر(نیوز ڈیسک) غیر قانونی طور پر بھارت کے زیر قبضہ جموں و کشمیر میں پیپلز ڈیموکریٹک پارٹی کی صدر محبوبہ مفتی نے کہا ہے کہ بھارتی فوج نے جنوبی کشمیر میں مسلمانوں کو” جے شری رام” کے نعرے لگانے پر مجبور کیا۔
کشمیر میڈیا سروس کے مطابق محبوبہ مفتی نے ایک ٹویٹ میں کہا کہ وہ مقبوضہ جموں و کشمیر کے علاقے پلوامہ میں ایک مسجد میں فوجی اہلکاروں کے گھسنے اور اندر موجود مسلمانوں کو ”جے شری رام ”کے نعرے لگانے پر مجبور کرنے کے بارے میں سن کر حیران رہ گئیں۔ انہوں نے کہا کہ امرناتھ یاترا سے پہلے اس طرح کا اقدام اوروہ بھی اس وقت جب بھارتی وزیر داخلہ امیت شاہ جموں و کشمیر میں موجود ہوں، محض اشتعال انگیزی ہے۔ انہوں نے واقعے کی فوری تحقیقات اوراس میں ملوث اہلکاروں کے خلاف کارروائی کا مطالبہ کیا۔
