مظفرآباد 19جولائی(نیوز ڈیسک )کل جماعتی حریت کانفرنس آزاد جموں وکشمیر شاخ کی اکائی تنظیم تحریک شباب المسلمین کے زیر اہتمام آج آزاد کشمیر کے دارالحکومت مظفرآباد میں یوم الحاق پاکستان کے موقع پرایک ریلی نکالی گئی ۔
کشمیرمیڈیاسروس کے مطابق ریلی میں طلبہ اور تحریک شباب المسلمین کے کارکنوں سمیت بڑی تعداد میں لوگوں نے شرکت کی اور پاکستان اور کشمیر کے حق میں اور بھارت کے خلاف نعرے بلند کئے ۔ مظفرآباد کی فضا ”ہم پاکستانی ہیں اورپاکستان ہمارا ہے” کے فلک شگاف نعروں سے گونج اٹھی ۔ مظاہرین نے مرکزی شاہراہ پر لال چوک اپڑ اڈہ سے سی ایچ ایم مظفرآباد تک مارچ کیا۔ شرکا سے خطاب کرتے ہوئے مقررین نے کہا کہ آج جموں و کشمیر کے عوام سات دہائیوں سے زائد عرصہ گزرنے کے بعد بھی کشمیری عوام 19جولائی 1947کی قرار داد کی تجدید کر رہے ہیں۔ انہوں نے کہاکہ سرینگر میں پاس کی گئی تاریخی قرارداد مسلمانان کشمیر کی پاکستان کے ساتھ نظریاتی اور فکری وابستگی کا عملی اظہار اورجموں و کشمیر کی غالب مسلم اکثریت کی خواہشات اور امنگوں کی ترجمانی تھی۔ریلی میں نصیر میر، زبیر درانی، منیر احمد کونشی، فیض اللہ درانی، زبیر شاہ، شاہد اعوان، ارشد اعوان، عاطف میر، امتیاز اعوان، راجہ محمد فیضان، حبیب اللہ میر، احمد شیخ، چوہدری عاطف ،فراز شیخ اور دیگر نے شرکت کی ۔
یوم الحاق پاکستان کے موقع پر مظفر آباد میں ریلی
مناظر: 588 | 19 Jul 2023