نئی دلی 22جولائی (نیوز ڈیسک ) بھارتی ریلوے نے دارلحکومت نئی دلی میں واقع صدیوں پرانی دو مساجد کی مسماری کا حکمنامہ جاری کرتے ہوئے اس پر 15روز کے اندر اندر عملدرآمد کی ہدایت کی ہے۔
کشمیرمیڈیاسروس کے مطابق محکمہ ریلوے نے آج(ہفتہ) ایک نوٹیفکیشن جاری کیا جس میں بنگالی مارکیٹ مسجد اور تکیہ ببر شاہ مسجد کو پندرہ روز یا اس سے کم وقت میں مسمار کرنے کی ہدایت کی گئی ہے۔ ریلوے نے دعویٰ کیا یہ دونوں مساجداسکی اراضی پر تعمیر کی گئی ہیں۔ محکمہ ریلوے نے دونوں مساجد کی انتظامیہ کو اس حوالے سے نوٹس جاری کر دیا ہے۔ بھارتی ذرائع ابلاغ کی رپورٹس کے مطابق بابر شاہ تکیہ مسجد تقریباً چار سو برس پرانی ہے۔
مساجد کمیٹیوں کا بھی کہناہے کہ ایک مسجد ڈھائی سو برس جبکہ دوسری پانچ سو برس پرانی ہے۔
دریںاثنا دہلی وقف بورڈ نے ریلوے کے حکمنامے پر ردعمل ظاہر کرتے ہوئے کہا ہے کہ وہ اس معاملے میں ہائیکورٹ سے رجوع کرے گا۔