سرینگر30جولائی(نیوز ڈیسک ) غیر قانونی طور پر بھارت کے زیر قبضہ جموں و کشمیر میں پیپلز ڈیموکریٹک پارٹی کی صدر محبوبہ مفتی نے کہا ہے کہ حضرت امام حسین رضی اللہ عنہ اور ان کے جانثار ساتھیوں کی عاشورہ کے موقع پر دی گئی قربانیاں بنی نوع انسان کو جھوٹ اور فریب کی ہار اور حق اور سچ کی جیت کی یاد دلاتی رہیں گی۔
محبوبہ مفتی نے سرینگر میں اپنے پیغام میں کہا کہ کربلا کے واقعات ہمیں ہر مشکل حالات میں صداقت کے اصولوں کو برقرار رکھنے اور برائی کی قوتوں کے سامنے نہ جھکنے کا سبق دیتے ہیں۔انہوں نے کہا کہ کربلا میں حضرت امام حسین رضی اللہ عنہ اور ان کے ساتھیوں نے جس بے مثال جرات، قربانی اور صبر کا مظاہرہ کیا اس نے انصاف اور مساوات پر مبنی نظام پر ہمارے ایمان کو تقویت بخشی۔ انہوں نے کہا کہ عاشورہ محرم پوری انسانیت کے لئے روشنی ا ور رہنمائی کا موقع ہے۔
