اسلام آباد02 اگست (نیوز ڈیسک ) کل جماعتی حریت کانفرنس آزاد جموں و کشمیرشاخ کے کنوینر محمود احمد ساغر نے 5 اگست کو کشمیر کی حالیہ تاریخ کے سیاہ ترین بابوں میں سے ایک قرار دیتے ہوئے کہ نریندر مودی کی ہندو توا بھارتی حکومت نے 2019میں اس روز جموںوکشمیر کی خصوصی ختم کرنے کی جو غیر قانونی کارروائی کی اسکا واحد مقصد مقبوضہ علاقے میں مسلمانوں کی اکثریت کو اقلیت میں تبدیل کرنا ہے۔
کشمیر میڈیا سروس کے مطابق محمود احمد ساغر نے اسلام آباد میں جاری ایک بیان میںکہا کہ5اگست کو بھارت نے کشمیریوں کا بدترین استحصال کیا اور اس دون کو یوم استحصال کے طور پر یاد رکھا جائے گا۔ انہوں نے کشمیریوں پر زور دیا کہ وہ پانچ اگست کو یوم سیاہ کے طورپر منا کر عالمی برادری کویہ واضح پیغام دیں کی انہیں بھارت کا غیر قانونی قبضہ ہرگز تسلیم نہیں۔
انہوں نے کہا کہ کشمیری حق خودارادیت کے حصول تک اپنی جدوجہد جاری رکھیں گے اوربھارتی ظلم وجبر انہی اپنا ناقابل تنسیخ حق ، حق خود ارادیت حاصل کرنے سے نہیں روک سکتا۔انہوں نے کہا کہ جموںو کشمیر کی خصوصی حیثیت ختم کرنے کا غیر قانونی بھارتی اقدام کشمیر کی منفرد شناخت، ثقافت، آبادی پر ظالمانہ حملہ ہے۔کل جماعتی حریت کانفرنس آزاد جموں وکشمیر شاخ کے کنوینرنے کنٹرول لائن کے دونوں جانب اور دنیا بھر میں مقیم کشمیریوں پر زور دیا کہ وہ بھارتی جارحیت کے خلاف 5 اگست کواحتجاجی مظاہرے ، جلسے جلوس کریں اور دنیا کی توجہ کشمیری عوام کی حالت زار کی طرف مبذول کرائیں۔