جموں07اگست(نیوز ڈیسک ) غیر قانونی طور پر بھارت کے زیر قبضہ جموں و کشمیر کے ضلع پونچھ میں سڑک کے مختلف حادثات میں دو افراد کی موت ہوگئی ہے۔
بھارتی فوج کا ایک پورٹر بدھا امرناتھ مندر سے تحصیل ہیڈ کوارٹر منڈی کی طرف جا رہا تھا کہ آلا پیر بازار میں پہنچ کر حادثے کا شکار ہو گیا۔ اسے سب ڈسٹرک ہسپتال منڈی لے جایا گیا جہاں ڈاکٹروں نے اسے مردہ قرار دیا۔ قانونی کارروائی کے بعد لاش لواحقین کے حوالے کر دی گئی۔ایک اور حادثہ سرنکوٹ کے علاقے میں اس وقت پیش آیا جب ایک بس نے موٹر سائیکل پر سوار نوجوان کو ٹکر مار دی جس سے اس کی موت ہوگئی۔
دریں اثناء جموں خطے میں اب تک ڈینگی انفیکشن کے 25کیسز سامنے آئے ہیں۔ریاست کے ملیریاولوجسٹ ڈاکٹر ہرجیت رائے نے کہاکہ جنوری سے اب تک ڈینگی کے کل 25کیسز ریکارڈ کیے گئے ہیں۔ انہوں نے کہا کہ ان میں اکثریت ضلع جموں سے ہے اور صرف چند ہی کیس ادھم پور، کٹھوعہ اور سانبہ اضلاع سے رپورٹ ہوئے ہیں۔