سرینگر13اگست (نیوز ڈیسک )بھارتی فوجیوں نے غیر قانونی طورپربھارت کے زیر قبضہ جموں و کشمیر کے ضلع پونچھ میں کنٹرول لائن کے قریب ایک درجن سے زائد گائوں میں محاصرے اور تلاشی کی کارروائیاں شروع کی ہیں۔
بھارتی فوج اور پولیس نے 15اگست کو بھارت کے یوم آزادی سے قبل مینڈھر سب ڈویژن کے علاقے گورسائی میں مشترکہ آپریشن شروع کیاہے۔فورسز اہلکاروں نے سلواہ، سروتی، گرسائی ٹاپ، سنائی، کیری کنگا اور ترکھرا سمیت ایک درجن سے زائد گائوں کومحاصرے میں لے کر تلاشی کی کارروائیاں شروع کیں۔ضلع کی تمام اہم سڑکوں پر گاڑیوں کی تلاشی کے لئے خصوصی ناکے لگائے گئے ہیں۔