سرینگر (نیوزڈیسک) غیر قانونی طورپربھارت کے زیر قبضہ جموں و کشمیر میں پیپلز ڈیموکریٹک پارٹی کی سربراہ محبوبہ مفتی نے کہاہے کہ جموں وکشمیر کو بھارتیہ جنتا پارٹی کے تباہ کن یکطرفہ فیصلوں کا سب سے زیادہ نقصان اٹھانا پڑا ہے۔
محبوبہ مفتی نے متعددٹویٹس میں کہا کہ بی جے پی اپوزیشن اوراس پر کی جانیوالی ہر قسم کی تنقید ی آوازوں کو دبانے کے درپے ہے جس سے ظاہرہوتا ہے کہ صرف ایک پارٹی کی بالادستی کے لیے جمہوری قوانین اور ایجنسیوں کا غلط استعمال کیا جا رہا ہے۔ انہوں نے مزید کہا کہ ہماری آخری امید عدلیہ سے ہے۔ لیکن افسوس کی بات ہے کہ انصاف میں کس طرح تاخیر ہوتی ہے اور کس طرح چن چن کر سزا دی جاتی ہے۔ عدالتیں دفعہ370، بلقیس بانوکیس اورمتنازعہ قانون شہریت کی سماعت میں دانستہ طورپر تاخیر کرتی ہیں لیکن ہتک عزت کے معمولی مقدمات کو تیز رفتاری سے چلایا جاتا ہے۔