نئی دلی (نیوز ڈیسک)بھارت میں انڈین نیشنل کانگریس کے صدر ملکار جن کھرگے نے وزیر اعظم نریندر مودی کو ایک زہریلا سانپ قرار دیا ہے۔
ملکار جن کھرگے نے ریاست کرناٹک کے علاقے کالا بوراگی میں ایک انتخابی اجلاس کے دوران کہا کہ وزیر اعظم مودی ایک زہریلے سانپ کی طرح ہیں۔انہوںنے کہا کہ آپ سوچیں گے کہ یہ زہر ہے یا نہیں لیکن اگر آپ اسے چکھیں گے تو آپ مر جائیں گے۔
انہوں نے کہا کہ بی جے پی کی بدعنوان حکومت ملک کو لوٹ رہی ہے ، ہر کام پر 40فیصد کمیشن لیا جاتا ہے۔ بی جے پی حکومت اُن لوگوںکو ملک سے بھاگنے میں مدد کرتی ہے جن پر بدعنوانی کے الزامات لگتے ہیں ، مودی خود کرپٹ لوگوں کو بچانے میں مصروف ہیں۔
بی جے والے کانگریس صدر کے اس بیان پر سخت تلملا اٹھے ہیں۔ کرناٹک کے بی جے پی وزیر اعلیٰ بسواراج بومئی نے اپنی بھڑاس نکالتے ہوئے کہا کہ کھرگے کے اپنے دماغ میں زہر ہے اور وہ مودی اور بی جے پی کے بارے میں متعصبانہ ذہن رکھتے ہیں۔