امرتسر (نیوز ڈیسک ) ایک مسافر کو نشے کی حالت میں دبئی امرتسر پرواز میں ایئر ہوسٹس کے ساتھ چھیڑ چھاڑ کرنے کے الزام میں گرفتار کرلیا گیا۔پولیس نے بتایا کہ راجندر سنگھ جس کا تعلق پنجاب کے شہر جالندھر کے گاؤں کوٹلی سے ہے، نے ایئر ہوسٹس کے ساتھ بحث کی اور مبینہ طور پر اس کے ساتھ چھیڑ چھاڑ کی۔ ایئر ہوسٹس یہ واقعہ عملے کے نوٹس میں لائی ، ملزم مبینہ طور پر نشے کی حالت میں تھا۔ اس کے بعد عملے کے ارکان نے امرتسر کنٹرول روم کو معاملے کے بارے میں مطلع کیا اور ایئر لائن کے اسسٹنٹ سیکیورٹی مینیجر نے پولیس میں شکایت درج کرائی۔
این ڈی ٹی وی کے مطابق ملزم کو امرتسر کے شری گرو رام داس جی بین الاقوامی ہوائی اڈے پر پہنچنے پر گرفتار کرلیا گیا۔ ملزم کے خلاف تعزیرات ہند کی دفعہ 354 (عورت پر حملہ یا اس کی عزت کو مجروح کرنے کے ارادے سے حملہ کرنا) اور دفعہ 509 (لفظ، اشارہ یا فعل جس کا مقصد کسی خاتون کی عزت نفس کی توہین کرنا ہے) کے تحت مقدمہ درج کیا گیا ہے۔