سرینگر (نیوز ڈیسک ) غیر قانونی طور پربھارت کے زیر قبضہ جموں و کشمیر میں کانگریس کے صدر وقار رسول وانی نے کہا ہے کہ بھارتیہ جنتا پارٹی نے جموں و کشمیر کی خصوصی حیثیت چھین کر اور اسے مرکز کے زیر انتظام دو علاقوں میں تقسیم کرکے کشمیریوں کی بے عزتی کی ہے۔
جنوبی کشمیر میں ڈی ایچ پورہ کے علاقے احمد آباد میں ایک عوامی ریلی سے خطاب کرتے ہوئے وقاررسول نے کہا کہ بی جے پی حکومت نے کشمیری عوام کو ہر محاذ پر مایوس کیاہے۔انہوں نے کہا کہ بھارت میں بالعموم اور جموں و کشمیر میں بالخصوص حکمران بی جے پی کی دھوکہ دہی اور فریب پر مبنی پالیسیوں سے لوگ مایوسی اور ناامیدی کا شکار ہیں۔وقاررسول نے بجلی کی قلت، ناقص راشن کی فراہمی، ترقی کے فقدان اور بے روزگاری سمیت لوگوں کو درپیش مسائل پر شدید تشویش کا اظہار کیا۔