سرینگر 27جون (نیوزڈیسک) غیر قانونی طور پر بھارت کے زیر قبضہ جموں و کشمیر میں غیر قانونی طور پر نظر بند جموں و کشمیر مسلم لیگ کے رہنما معراج الدین نندا کی والدہ گزشتہ شب سرینگر میں انتقال کر گئیں۔
وہ اپنے بیٹے کی مسلسل غیر قانونی نظربندی کی وجہ سے ڈپریشن اور دیگر نفسیاتی مسائل کا شکار تھیں۔ وہ گزشتہ شب سرینگر کے صورہ انسٹی ٹیوٹ آف میڈیکل سائنس میں انتقال کر گئیں۔بانڈی پورہ کے علاقے حاجن کے رہائشی معراج الدین نندا اس وقت بھارتی ریاست اتر پردیش کی آگرہ سینٹرل جیل میں غیر قانونی طورپر نظربند ہیں۔معراج الدین کی والدہ نے کئی بار جیل میں ان سے ملاقات کی کوشش کی تاہم قابض حکام نے انہیں اجازت نہیں دی ۔
ادھرکل جماعتی حریت کانفرنس کے رہنمائوں غلام احمد گلزار، عبدالاحد پرہ، حکیم عبدالرشید، کل جماعتی حریت کانفرنس آزاد کشمیر شاخ کے کنوینر محمود احمد ساغر، کشمیربار ایسوسی ایشن کے رکن ایڈوکیٹ جی این شاہین اور دیگر نے اپنے بیانات میں معراج الدین نندا سے ان کی والدہ کے انتقال پر تعزیت کا اظہار کیاہے۔

دریں اثناء مسلم لیگ جموں کشمیر کا ایک اعلی سطح کا وفد جس میں قائمقام چیئرمین عبد الاحد پرہ، فاروق احمد توحیدی، اسداللہ پرے بشیر احمد بٹ ،وحید احمد گوجری، محمد یوسف بٹ، غلام حسن شاہ اور پیر عبدالمجید شامل تھے معراج الدین نندا کی والدہ کی نماز جنازہ میں شرکت کیلئے حاجن بانڈی پورہ گیا ۔ اس موقع پرعبدالاحد پرہ نے کل جماعتی حریت کانفرنس کے چیئرمین مسرت عالم بٹ اور مسلم لیگ کی جملہ قیادت کی طرف سے سوگوار خاندان کے ساتھ ہمدردی، یکجہتی اور تعزیت کا اظہار کیا ۔