امپھال 03 اگست (نیوز ڈیسک ) بھارتی ریاست منی پور میں تشدد ، جلاؤ گھیراؤ کا سلسلہ بدستور جاری ہے۔ ایک تازہ واقعے میں نامعلوم افراد نے دو مکانات کو آگ لگا دی۔
کشمیر میڈیا سروس کے مطابق لانگول کے علاقے میں واقع یہ مکات خالی تھے ، فسادات کی وجہ سے گھروں کے مکین انہیں چھوڑ چکے تھے۔ ایک افسر نے بتایا کہ فائر ٹینڈرز نے بروقت موقع پر پہنچ کر آگ پر قابو پالیا ۔ انہوں نے مزید کہا کہ واقعے میں کوئی زخمی نہیں ہوا۔
یاد رہے کہ منی پور 3مئی سے بدترین تشدد کی لپیٹ میں ہے۔ میتی (ہندو ) قبیلے کے لوگو ں نے کوکی(عیسائی) قبیلے کے سینکڑوں گرجا گھر مسمار اور نذر آتش کر دیے ہیں۔ میتی برادری کے افراد کی طرف سے دو کوکی (عیسائی ) خواتین کو برہنہ کر کے گاؤں کی سڑکوں پر گھمانے کی ایک شرمناک ویڈیو بھی حال ہی میں منظر عام پر آئی تھی جو عالمی سطح پر بھارت کیلئے انتہائی شرمندگی کا باعث بنی ہے ۔تشدد کے واقعات میں ا ب تک دیڑھ سو سے زائد لوگ ہلاک ہو چکے ہیں۔ ہزاروں افراد بے گھر ہوئے ہیں جنیں مختلف ریلیف کیمپوں میں ٹھہرایا گیا ہے۔