نئی دہلی(نیوز ڈیسک ) بھارت میں گروپ 20سربراہ اجلاس سے قبل جنوری سے اب تک غریبوں کے سینکڑوں مکانات اور سڑک کنارے لگے سٹالز کو منہدم کر دیا گیا ہے جس سے ہزاروں لوگ بے گھر اور روزگار سے محروم ہو گئے ہیں۔
درجنوں جھونپڑیوں کو زمین بوس کر دیا گیا۔ بہت سے رہائشیوں کو انہدام کے عمل سے کچھ ہی دیر قبل بے دخلی کے نوٹس موصول ہوئے۔حکام کا دعویٰ ہے کہ یہ مسماری مہم غیر قانونی تجاوزات کے خلاف کی گئی ہے لیکن بے دخل کیے جانے والے لوگ اور انسانی حقوق کے کارکن حکام کے اس دعوے کو غلط قرار دے رہے ہیں۔اسی طرح کی مسماری مہم ممبئی اور کولکتہ میں بھی کی گئی ہے جہاں دلی میں ہونے والے سر براہ اجلاس سے قبل فورم کے اجلاس منعقد کیے گئے۔نئی دلی میں گروپ 20سربراہ اجلاس 9اور 10ستمبر کو منعقد ہو گا۔