سرینگر(نیوز ڈیسک ) حریت رہنمائوں نے غیر قانونی طور پر بھارت کے زیر قبضہ جموں و کشمیر اور اس کے عوام کی شناخت اور سالمیت کو درپیش خطرات کے پیش نظر تنازعہ کشمیر کو اقوام متحدہ کی قراردادوں کے مطابق حل کرانے کے لیے متحدہ جدوجہد پر زور دیا ہے۔
کشمیر میڈیا سروس کے مطابق غلام محمد خان سوپوری، فاروق احمد توحیدی اور نریندر سنگھ خالصہ سمیت حریت رہنمائوں نے مسئلہ کشمیر کے حل پر زور دیا تاکہ علاقے میں بھارتی تشدد کو ختم کیا جائے۔انہوں نے کہا کہ 5اگست 2019کا فیصلہ ایک غیر قانونی اقدام اور جموں و کشمیر کی مسلم شناخت پر حملہ ہے۔ انہوں نے کہا کہ کشمیری مسلمانوں کی زندگی کا ہر پہلو ہندوتوا بی جے پی حکومت کے حملے کی زد میں ہے۔ حریت رہنمائوں نے کہاکہ بی جے پی-آر ایس ایس کی حکومت اسرائیلی طرز پر مقبوضہ جموں وکشمیر میں منظم طریقے سے آباد کار ی کی راہ ہموار کر رہی ہے۔انہوں نے اقوام متحدہ پر زور دیا کہ وہ مقبوضہ جموں و کشمیر میں بھارت کے مذموم منصوبوں کا نوٹس لے اور تنازعہ کشمیر کو اقوام متحدہ کی قراردادوں اور بین الاقوامی قوانین کے مطابق حل کرے۔