آستانہ (نیوز ڈیسک ) قازقستان کی حکومت نے کان میں آتشزدگی سے 45 افراد کی ہلاکتوں کے بعدبھارتی تاجر لکشمی متل کی کمپنی کو قومی تحویل میں لے لیا ہے۔
بدترین حادثے کے بعد قازقستان کے صدر نے لکسمبرگ میں قائم کمپنی کے ساتھ معاہدے کو ختم کرنے کا حکم دے دیا اور کمپنی کو قومی تحویل میں لینے کا فیصلہ کیا گیا ہے۔بھارتی تاجر لکشمی متل کی سربراہی میں آرسیلر متل قازقستان میں تقریباً 15 فیکٹریاں اور کانیں چلاتی ہے۔قازقستان میں آتشزدگی کا یہ ہولناک واقعہ وسطی ایشیائی ملک کی تاریخ کا بدترین حادثہ قرار دیا جا رہا ہے۔بتایا جاتا ہے کہ حادثہ ہفتے کو کاراگنڈا کے علاقے میں واقع کوسٹینکو کول مائن میں پیش آیا، یہ حادثہ آرسیلر متل کی کانوں میں ہونے والے مہلک واقعات کے ایک سلسلے کے بعد پیش آیا ہے۔