ممبئی (نیوز ڈیسک ) بھارت میں زیر تعمیر سرنگ گرنے سے 7 روز سے پھنسے 40 مزدوروں کو بچانے کی کوشش جاری ہے تاہم ڈرل مشین خراب ہونے سے ریسکیو آپریشن کو روک دیا گیا۔ بھارتی ریاست اتراکھنڈ میں گزشتہ اتوار کو زیر تعمیر سرنگ گرنے کا واقعہ پیش آیا تھا جس میں 40 مزدور دب گئے تھے۔ بھارتی میڈیا کے مطابق سرنگ میں مزدوروں کو پھنسے ہوئے 150 گھنٹے ہوگئے ہیں جنہیں نکالنے کے لیے ریسکیو انتظامیہ کام کررہی ہے اور ہیوی مشینری کی مدد لی جارہی ہے۔ بتایا جارہا ہے کہ گرنے والی سرنگ میں مزدور زندہ ہیں اور انہیں آکسیجن کے ساتھ ساتھ کھانا، پانی بھی سرنگ میں بچھائی جانے والی لائنوں کے ذریعے سے فراہم کیا جارہا ہے۔ میڈیا رپورٹس کے مطابق مزدوروں کو نکلانے میں ڈرل مشین کا سہارا لیا جارہا تھا کہ بدقسمتی سے گزشتہ رات وہ بھی خراب ہوگئی اور دوسری مشین منگوانے کے لیے ریسکیو آپریشن کو روک دیا گیا ہے جسے ہوائی جہاز کے ذریعے جائے حادثہ پر پہنچایا جانا ہے۔ دوسری جانب طبی عملے کی جانب سے بھی انتظامیہ پر جلد از جلد مزدوروں کو نکالنے کے لیے زور دیا جارہا ہے کیونکہ زیادہ دیر تک سرنگ میں رہنے سے مزدروں کی حالت غیر ہونے کا بھی خدشہ ہے۔ واضح رہے ریاست اتراکھنڈ میں بہت سی عبادت گاہیں ایسی ہیں جہاں زائرین کا رش لگا رہتا ہے، اسی وجہ سے زائرین کی سہولت کے لیے حکومت کی جانب سے سرنگ سے سڑک نکالنے کا پروجیکٹ شروع کیا گیا تھا۔