سرینگر(نیوز ڈیسک ) معذور افراد کے عالمی دن کے موقع پر کشمیر میڈیا سروس کی طرف سے جاری کی گئی ایک رپورٹ میں کہا گیا ہے کہ بھارتی فوجیوں، پیراملٹری فورسز اور پولیس اہلکاروں کی طرف سے استعمال کیے جانے والے ظالمانہ اور غیر انسانی تشدد کے ہتھکنڈوں سے ہزاروں کشمیری زندگی بھر کے لیے معذور بن چکے ہے جن میں 200سے زائد وہ کشمیری بھی شامل ہیں جو ایک یا دونوں آنکھوں کی بینائی سے محروم ہوئے ہیں۔رپورٹ میں کہا گیا ہے کہ کشمیریوں کو معذور اور ناکارہ بنانے کے لیے بھارتی فوجیوں کی طر ف سے استعمال کیے جانے والے ظالمانہ ہتھکنڈوں میں مظاہرین پرگولیاں ، پیلٹ، آنسو گیس اور مرچی والی گیس گولے چلانا شامل ہیں۔ اس کے علاوہ تفتیشی مراکز میںشدید مار پیٹ، بجلی کے جھٹکے دینا، ٹانگوں کے پٹھوں کو کچلنے کے لئے لکڑی کے رولرپھیرنا، گرم اشیا سے جلانا اور الٹا لٹکاناشامل ہے۔رپورٹ میں افسوس کا اظہار کیا گیا کہ اس کے علاوہ نہتے کشمیریوں کے خلاف بوبی ٹریپ اور بارودی سرنگوں کا بھی استعمال کیا گیا جس کی وجہ سے 1947سے اب تک ہزاروں اموات ہوئیں اور بے گناہ افراد معذور ہوئے۔رپورٹ میں کہاگیا کہ ہزاروں کشمیری ایک یا دونوں آنکھوں کی بینائی کھونے کے دہانے پر ہیں۔رپورٹ میں عالمی برادری پر زور دیا گیا کہ وہ مقبوضہ جموں وکشمیرمیں منظم تشدد کے ہتھکنڈوںکے ذریعے کشمیریوں کو معذور بنانے کے بھارتی حکومت کے غیر انسانی عمل کا نوٹس لے۔
دریں اثنا ء کل جماعتی حریت کانفرنس کے رہنمائوں غلام محمد خان سوپوری، زمردہ حبیب، یاسمین راجہ، فریدہ بہن جی، ڈاکٹر مصعب، چوہدری شاہین اقبال، غلام نبی وار، حکیم عبدالرشید، سید بشیر اندرابی، خواجہ فروس،محمد عاقب، جموں و کشمیر ڈیموکریٹک فریڈم پارٹی اور دیگر نے اپنے الگ الگ بیانات میں کہا کہ بھارتی فوجی اور پولیس اہلکار علاقے میں معصوم نوجوانوں اور بچوں کو گرفتار کر رہے ہیں اور انہیں تشدد کا نشانہ بنا کر جسمانی طور پر معذور بنا رہے ہیں۔انہوں نے کہا کہ ہیومن رائٹس واچ سمیت کئی بین الاقوامی اداروں نے کشمیریوں پر بھارتی مظالم کے حوالے سے چشم کشا رپورٹیں جاری کی ہیں لیکن اس کے باوجودمقبوضہ جموں وکشمیر میں بھارتی ظلم و ستم میں روز بروز اضافہ ہوتا جا رہا ہے۔انہوں نے اقوام متحدہ اور عالمی طاقتوں سے اپیل کی کہ وہ مقبوضہ جموں وکشمیرمیں بھارتی ریاستی دہشت گردی کو روکنے کے لئے اپنا کردار ادا کریں۔

دریں اثنا کل جماعتی حریت کانفرنس آزادجموں وکشمیر شاخ کے زیر اہتمام لاہور میںبھارت کے غیر قانونی زیر قبضہ جموںوکشمیر میں بھارتی فوجیوں کے مظالم اور سرینگر کی ایک یونیورسٹی میں زیر تعلیم ہندو بھارتی طالب علم کی طرف سے آنحضورﷺ کی شان اقدس میں توہین آمیز ویڈ پوسٹ کرنے کے خلاف احتجاجی مظاہرہ کیا گیا۔مظاہرے کی قیادت کل جماعتی حریت کانفرنس آزاد جموںوکشمیر شاخ کے رہنما انجینئر مشتاق محمود نے کی۔ انہوں نے اس موقع پر کہا کہ مودی حکومت نے مقبوضہ جموںوکشمیر میں مظالم کی انتہا کر دی ہے ، مسلمان اپنے پیارے نبی کی شان میں گستاخی ہرگز برداشت نہیں کریں گے۔انہوں نے گستاخی کرنے والے ہندو طالب علم کوکڑی سزا دینے کا مطالبہ کیا۔