اسلام آباد (نیوز ڈیسک) سابق ڈپٹی اسپیکر پنجاب اسمبلی دوست محمد خان مزاری سمیت سیاسی شخصیات نے ن لیگ میں شمولیت کا اعلان کردیا۔
پنجاب سے تعلق رکھنے والی سیاسی شخصیات نے پاکستان مسلم لیگ (ن) کے صدر شہباز شریف سے ملاقات کی۔
سردار ریاض خان مزاری اور سابق ڈپٹی اسپیکر پنجاب اسمبلی دوست محمد خان مزاری کے ساتھ مولانا ایم آصف معاویہ، بابر خان سیال، مسز نیلم سیال ن لیگ میں شامل ہوگئیں۔
مہر اسلم بھروانہ، شیخ ایم یونس، خالد محمود سرگانہ چوہدری خالد غنی، امیر عباس سیال، فیصل حیات جبوانہ، شیخ یعقوب، مسز شیخ یعقوب، رئیس محمد ابراہیم بھی مسلم لیگ (ن) میں شامل ہونے والوں میں شامل ہیں۔
اس موقع پر شہباز شریف نے کہا کہ مہنگائی سے عوام کو نجات دلانے کیلئے نواز شریف کے ہاتھ مضبوط کرنے ہیں، پاکستان کو معاشی طور پر پیروں پر کھڑا کرنے کی جدوجہد سب مل کر کریں گے، بحرانوں کا مقابلہ اتحاد، اتفاق اور سیاسی تعاون سے کریں گے۔
دوسری جانب شہباز شریف سے پارٹی رہنما رانا تنویر، شذرہ منصب کھرل، سید باسط بخاری اور سیدہ نوشین افتخار سمیت میاں عمران قریشی اور حامد حمید نے بھی ملاقاتیں کیں۔
ملاقات کے دوران مستقبل میں پارٹی کی سرگرمیوں اور انتخابات کی تیاریوں پر گفتگو کی گئی، جبکہ رہنماؤں نے اپنے اپنے حلقے میں انتخابات کی تیاریوں سے متعلق پارٹی صدر کو آگاہ کیا۔
