سرینگر(نیوز ڈیسک ) بھارت کے غیر قانونی زیر قبضہ جموں و کشمیر میں پوسٹرچسپاں کیے گئے ہیں جن کے ذریعے اقوا م متحدہ پر زور دیا گیا ہے کہ وہ ہ جموں و کشمیر میں استصواب رائے کے انعقاد کے لیے بھارت پر دباؤ ڈالے۔
کشمیر میڈیاسروس کے مطابق پوسٹر مختلف آزادی پسند تنظیموں نے سرینگر اور دیگر علاقوں میں دیواروں، کھمبوں اور ستونوں پر چسپاں کیے ہیں۔ پوسٹروں میں لکھا ہے کہ بھارت حق خودارادیت کا مطالبہ کرنے پر کشمیریوں کو بے انتہا مظالم کا نشانہ بنا رہا ہے،کشمیریوں کی زندگیاں بھارتی فوجیوں کے رحم و کرم پر ہیں۔
پوسٹروں میں میں کہا گیا ہے کہ بھارتی مظالم کیوجہ سے کشمیریوں کی روزمرہ کی زندگی جہنم بن گئی ہے، بھارتی فوجیوں کو کالے قوانین کے تحت بے لگام اختیارات حاصل ہیں اور وہ بے گناہ کشمیریوں کو دوران حراست اور جعلی مقابلوں میں شہید کر رہے ہیں۔
پوسٹروں کے ذریعے عالمی برادری پر بھی زور دیا گیا کہ وہ مقبوضہ جموں وکشمیر میں بھارتی فوجیوں کے مظالم کا نوٹس لے۔