سرینگر(نیوز ڈیسک )بھارت کے غیر قانونی زیر قبضہ جموں وکشمیر میں محبوبہ مفتی کی سربراہی میں قائم پیپلز ڈیموکریٹک پارٹی (پی ڈی پی) نے کہا ہے کہ مقبوضہ علاقے کے لیفٹیننٹ گورنر نے بھارتیہ جنتا پارٹی کے لیے ایک بھرپور انتخابی مہم شروع کر رکھی ہے۔
کشمیر میڈیا سروس کے مطابق پی ڈی پی کے ترجمان نے سری نگر میں جاری ایک بیان میں کہا کہ لیفٹیننٹ گورنر منوج سہنا نے اپنے آئینی کردار سے ہٹ کر وسیع پیمانے پر بی جے پی کی انتخابی مہم کا آغاز کر دیا ہے جو پریشان کن ہے۔
انہوںنے کہا کہ لیفٹیننٹ گورنر بغیر کسی ٹھوس ثبوت کے دوسروں کو نشانہ بنا رہے ہیں ،انہیں چاہیے کہ وہ ایسے بے بنیاد الزامات لگانے سے باز رہیں جو عوامی شخصیات اور اداروں کی شبیہ کو داغدار کر سکتے ہیں۔