اسلام آباد (نیوز ڈیسک) قائداعظم محمد علی جناح کے سیکرٹری اور سابق صدر آزاد کشمیر خورشید حسن خورشید کی اہلیہ ثریا خورشید 90 برس کی عمر میں انتقال کرگئیں۔ فیملی ذرائع کے مطابق بیگم ثریا خورشید کا انتقال لاہور میں ہوا، وہ مادر ملت محترمہ فاطمہ جناح کی پرسنل سیکرٹری اور آزاد کشمیر قانون ساز اسمبلی کی رکن بھی رہیں۔ بیگم ثریا خورشید کی نماز جنازہ خالد مسجد کیولری گراؤنڈ لاہور میں ادا کی گئی، جس کے بعد انہیں مقامی قبرستان میں سپرد خاک کر دیا گیا۔ کشمیری حریت رہنما میر واعظ عمر فاروق نے کشمیرکے سابق صدر خورشید حسن خورشید کی اہلیہ ثریا خورشید کے انتقال پر گہرے دکھ اور افسوس کا اظہار کرتے ہوئے ادب اور سیاست کے میدان میں ان کی خدمات کو خراج تحسین پیش کیا۔
