نئی دلی (نیوز ڈیسک )غیر قانونی طور پر بھارت کے زیر قبضہ جموں و کشمیرکے خطے لداخ کے عوام نے لداخ ایپکس باڈی، کارگل ڈیموکریٹک الائنس اور بھارتی وزارت داخلہ کے درمیان مذاکرات بے نتیجہ ختم ہونے پر شدید غم و غصے کا اظہار کیا ہے ۔
کشمیرمیڈیاسروس کے مطابق مودی حکومت کی طرف سے لداخ کے عوام کے سیاسی حقوق کی بحالی اور چھٹے شیڈول میں شمولیت جیسے بنیادی مطالبات سے انکار پر انہوں نے شدید غم و غصے کا اظہار کیا ہے ۔ لداخ سے تعلق رکھنے والے رہنمائوں نے بھارتی وزیر داخلہ امیت شاہ کی قیادت میں وفد سے مذاکرات میں مقبوضہ علاقے سے متعلق بھارتی حکومت کی پالیسیوں پرکڑی تنقید کی ۔لیہہ اپیکس باڈی اور کارگل ڈیموکریٹک الائنس نے اپنے لوگوں کے حقوق کی وکالت جاری رکھنے کے عزم کا اعادہ کیاہے۔ انہوں نے اگست 2019 میں جموں و کشمیر کی خصوصی حیثیت کی منسوخی اور جموں وکشمیر کی دو یونین ٹیریٹریز میں تقسیم کے بعد کشمیریوں کے بنیادی حقوق سے مودی حکومت کے انکار پر افسوس کا اظہار کیا۔