سرینگر(نیوز ڈیسک) غیر قانونی طور پر بھارت کے زیر قبضہ جموں و کشمیرمیں وادی کشمیر کو بیرونی دنیا سے ملانے والی سرینگر جموں ہائی وے ضلع رام بن میں مٹی کے تودے گرنے کی وجہ سے ٹریفک کے لیے بند ہوگئی ہے ۔
کشمیر میڈیا سروس کے مطابق 270کلومیٹر طویل شاہراہ ضلع رام بن کے علاقے شلگاری میں مٹی کے تودے گرنے کی وجہ سے بند ہوگئی ہے ۔ لینڈ سلائیڈنگ کی وجہ سے شاہراہ پر 300سے زائد گاڑیاں پھنس گئی ہیں۔ ایک سرکاری عہدیدار نے میڈیا کو بتایاہے کہ 300سے زیادہ گاڑیاں ہائی وے کے مختلف مقامات پر پھنسی ہوئی ہیں۔انہوں نے کہاکہ شاہراہ ٹریفک کیلئے کھولنے کی غرض سے کارکنوں کو تعینات کیا گیا ہے، لیکن رام بن-بانہال سیکٹر میں مسلسل بارش کی وجہ سے امدادی سرگرمیوں میں خلل پڑ رہاہے ۔انہوں نے لوگوں سے کہاکہ وہ ٹریفک کنٹرول یونٹس کی تصدیق کے بغیر ہائی وے پر سفر نہ کریں۔
ادھرضلع کشتواڑ کے علاقے ٹھاکوریامیں ایک مکان پر تودہ گرنے سے 19سالہ کشمیری نوجوان ارشد جاںبحق ہو گیا ۔واقعے میں دیگر اہلخانہ محفوظ رہے ۔
