سرینگر(نیوز ڈیسک ) غیر قانونی طور پر بھارت کے زیر قبضہ جموں و کشمیر میں کل جماعتی حریت کانفرنس کے رہنما محمد یوسف نقاش نے سرینگر میں جی 20اجلاس کی آڑ میں بے گناہ کشمیریوں کی بلاجواز گرفتاریوں کی شدید مذمت کی ہے۔
کشمیر میڈیا سروس کے مطابق محمد یوسف نقاش نے سرینگر میں جاری ایک بیان میں کہا کہ پوری دنیا اچھی طرح جانتی ہے کہ جموں و کشمیر اقوام متحدہ کی طرف سے تسلیم شدہ متنازعہ علاقہ ہے اور 5اگست 2019کے یکطرفہ بھارتی اقدامات کے بعد کشمیریوں کو درپیش مشکلات میں مزیداضافہ ہوگیاہے۔انہوں نے کہا کہ مقبوضہ جموں وکشمیرمیں لوگوں کو جعلی مقابلوں میں شہید کرنا،بے گناہ لوگوں کو گرفتار کرکے بھارت کی مختلف جیلوں میں نظربند کرنا اورکشمیریوں کو سچ بولنے سے روکنے کے لیے بھارتی فورسز کی ریاستی دہشت گردی اپنے عروج پر ہے۔محمد یوسف نقاش نے جی 20 کے رکن ممالک پر زور دیا کہ وہ مقبوضہ علاقے میں ہونے والے اجلاس کا بائیکاٹ کریں اور بھارت سے کشمیریوں کو ان کا بنیادی حق خود ارادیت دینے کا مطالبہ کریں۔انہوں نے کہا کہ ہم خطے میں پائیدار اور دیرپا امن چاہتے ہیں جو اقوام متحدہ کی قراردادوں اور کشمیری عوام کی امنگوں کے مطابق تنازعہ کشمیر کے حل کے بغیر ممکن نہیں۔