سرینگر27 مئی (کے ایم ایس)بھارت کے غیر قانونی زیر قبضہ جموں و کشمیر میںہائیکورٹ نے ایک نوجوان کی کالے قانون پبلک سیفٹی ایکٹ(پی ایس اے) کے تحت غیر قانونی نظر بندی کالعدم قرار دیدی ہے۔
عدالت نے ضلع بارہمولہ کے علاقے پٹن کے رہائشی نوجوان فرہاد احمد لون کی نظر بندی کالعدم قرار دیتے ہوئے انتظامیہ کو اسے فوری طو ر پر رہا کرنے کے احکامات دیے۔ عدالت نے نوجوان کی نظر بندی کے معاملے کی سماعت کے دوران کہا کہ ڈسٹرکٹ مجسٹریٹ بارہمولہ کی طرف سے دیا جانے والا نوجوان کی نظر بندی کا حکم بلا جواز اور غیر ضروری ہے ۔ عدالت نے مزید کہا کہ ریکارڈ کا جائزہ لینے سے معلوم ہوا کہ جب نظر بندی کا حکم دیا گیا تودرخواست گزار پہلے ہی زیر حراست تھا۔
