جموں 09جون (نیوز ڈیسک)غیر قانونی طور پر بھارت کے زیر قبضہ جموں و کشمیر میں انڈین نیشنل کانگریس کی جموںوکشمیر شاخ کے صدر وقار رسول وانی نے مودی حکومت کی طرف سے کشمیری عوام کی ترقی اور انہیں بااختیار بنانے کے حوالے سے وقتا فوقتا کئے جانے والے بلند بانگ دعوئوں پر حیرت کا اظہار کرتے ہوئے کہاہے کہ حقیقت یہ ہے کہ بی جے پی حکومت مقبوضہ علاقے مکمل طورپر ناکام ہو گئی ہے۔
وقار رسول وانی نے رام بن کے علاقے بانہال میں پارٹی کارکنوں کے ایک اجلاس کی صدارت کرتے ہوئے کہا کہ حقیقت یہ ہے کہ گزشتہ 9سال کے دوران بی جے پی کی حکومت کی غلط طرزحکمرانی کے دوران مقبوضہ کشمیرکو ہر لحاظ سے پسماندگی کی طرف دھکیل دیا گیا ہے۔انہوں نے کہا کہ مقبوضہ علاقے میںبے روزگاری میں تیزی سے اضافہ ہوا ہے اور لوگوں کو قابض انتظامیہ سے بالکل بھی کوئی امید نہیں ہے کہ وہ ان کے مسائل حل کرے گی ۔وقار رسول وانی نے کہا کہ مقبوضہ علاقے کی انتظامیہ میں کوئی جوابدہی اور شفافیت نہیں ہے اور بظاہر ایک منتخب حکومت کی عدم موجودگی میں لوگ مشکلات کا شکار ہیں کیونکہ انہیں بیوروکریسی کے رحم و کرم پر چھوڑ دیا گیا ہے، جو ان کی شکایات کو دور کرنے میں بری طرح ناکام ہے ۔ انہوں نے اسمبلی انتخابات کے انعقاد ،مقبوضہ کشمیرکی ریاستی شناخت بحالی اورلوگوں کو درپیش مشکلات دور کرنے کا مطالبہ کیا۔