سرینگر 10 جون (نیوز ڈیسک )بھارت کے غیر قانونی زیر قبضہ جموں وکشمیر میں” انجمن اوقاف جامع مسجد سری نگر“ نے تنظیم کے سربراہ میر واعظ عمر فاروق کی عید الاضحی سے قبل رہائی کا مطالبہ کیا ہے۔
میر واعظ عمر فاروق 5 اگست 2019 سے سری کے علاقے نگین میں اپنی رہائش گاہ میں نظر بند ہیں۔
انجمن اوقاف نے ایک بیان میں کہا کہ میر واعظ اپنی مسلسل نظر بندی کے باعث لگاتار 198 ویں ہفتے نماز جمعہ کا اہم مذہبی فریضہ ادا کرنے سے قاصر رہے جبکہ وہ دیگر سیاسی و معاشرتی ذمہ داریاں بھی ادا نہیں کر پا رہے۔بیان میں میرواعظ کی تقریباً چار برس سے مسلسل نظربندی کو انتہائی افسوسناک قرار دیا گیا۔
انجمن نے امید ظاہر کی کہ میر واعظ عمر فاروق کو حج کے مقدس ایام اور عید الاضحی کے تہوار سے پہلے رہا کر دیا جائے گا تاکہ وہ اپنی سیاسی، دینی اور معاشرتی سرگرمیاں دوبارہ شروع کر سکیں ۔