جموں26جون(نیوز ڈیسک ) غیر قانونی طور پر بھارت کے زیر قبضہ جموں و کشمیر میں جموں خطے کے ادھم پور اور سانبہ اضلاع میں لوگ کئی مقامات پر پنکھے اور خالی بالٹیاں لے کرسڑکوں پر نکل آئے اور بجلی کی غیر اعلانیہ کٹوتیوں پر حکام کے خلاف اپنا احتجاج درج کرایا۔
مین بازار ادھم پور، وارڈ نمبر 7شکتی نگر، پتن بھر ادھم پور اور دیگر علاقوں میں لوگوں کی بڑی تعداد سڑکوںپر نکل آئی اور حکام کے خلاف احتجاجی مظاہرے کئے۔مشتعل افراد نے حکومت کے خلاف نعرے بازی کرتے ہوئے کہا کہ گزشتہ چند دنوں سے علاقوں کے لوگوں کو بجلی کی مسلسل غیر اعلانیہ کٹوتی کا سامنا ہے جس کے نتیجے میں پانی کی فراہمی بھی شدید متاثر ہوئی ہے۔انہوں نے کہاکہ شدیدگرمیوں کے دنوں میںبجلی کی طویل اور غیر اعلانیہ کٹوتی نے زندگی اجیرن بنا دی ہے۔ بجلی کی بندش کے خلاف لوگوں نے سانبہ کے مرکزی بازار میں بھی احتجاجی ریلی نکالی۔احتجاجی مظاہرین نے بجلی اور پانی کی فراہمی سے محروم لوگوں کی حالت زار کو اجاگر کرنے کے لیے پنکھے اور خالی بالٹیاں اٹھارکھی تھیں۔اس موقع پر اظہار خیال کرتے ہوئے مقررین نے کہا کہ موسم گرما اپنے عروج پر ہے اور بجلی کی غیر اعلانیہ کٹوتی کی وجہ سے عوام کو شدیدپریشانی کا سامناہے۔انہوں نے کہا کہ بجلی کی قلت کی وجہ سے پانی کی سپلائی بھی بری طرح متاثر ہوئی ہے۔